اشترك الآن في "مسرحنا" ويمكنك الحصول علي " جريدة مسرحنا " كل أسبوع أينما كنت أرسل حوالة بريدية الي مؤسسة الأهرام_شارع الجلاء_القاهرة_اشتراكات الاهرام/ جريدة مسرحنا .. سعر النسخة لمدة عام: 52 جنيها داخل مصر 65 دولارا للدول العربية 95 دولارا للدول الأجنبية

القطة العميا

قييم هذا الموضوع
(1 vote)

 

فانتازيا التخبط ومحاولة الروئية‮       ‬
‮(‬إن لم نستطع فهم شيئ ما‮.. ‬لربما شعرنا به‮)‬
الشخصيات
ف1‮: ‬عاوزه عروسة بتقول بابا وماما
ف:2‮ ‬عاوزه نص‮ ‬غيف فيه حتة لحمه
ش1‮:‬‮ ‬عاوز بنت ناعمه لابسه فستان أزرق
ش :2عاوز سيف مايكونش خشب ولافيه لامبه
ش :3عاوز كتاب‮ .. ‬لكن مكتوب بحق وحقيقي
ش :4عاوز أي‮ ‬حاجه والسلام‮ ‬‮(‬وممكن أي‮ ‬حد‮ ‬يبقي‮ ‬عاوز أي‮ ‬حاجه‮) (‬وهناك شخصية‮ ‬غير مرئية علي‮ ‬الخشبه ولكنها محسوسة‮... ‬تضغط علي‮ ‬الجميع‮. ‬الديكور والملابس والمنظر وخلافه لا‮ ‬يستطيع روئيتها إلا المخرج الذي‮ ‬شعر بالنص فرآه فنفذه‮)‬
ف‮ ‬ :1ماما‮ .. ‬ماما‮ .. ‬هاتي‮ ‬فلوس أجيب عروسة
ف‮ ‬2‮: ‬بس‮ ‬يا بت روحي‮ ‬شيلي‮ ‬أخوكي‮ ‬الصغير
ف :1ماما بقولك هاتي‮ ‬فلوس أجيب عروسة
ف2‮: ‬‮ ‬وأنا بقولك روحي‮ ‬شيلي‮ ‬أخوكي‮ ‬الصغير أحسن
ف : 1كان عندي‮ ‬حلم بيمشي‮ ‬بالزمبلك‮ .. ‬جبته ومليته علي‮ ‬الآخر‮ .. ‬وحطيته علي‮ ‬الأرض قعد‮ ‬يجري‮.. ‬يجري‮ .. ‬دخل تحت الكنبة‮ .. ‬فين الحلم فين ؟
ش : 1إلحقي‮ .. ‬الحلم اتشعلق من البلكونة
ش :2 الحلم إتكعور من علي‮ ‬السلم
ش :3 الحلم ساب المدرسة واشتغل في‮ ‬ورشة
ش :4الأسطي‮ ‬ضربه بالمفك في‮ ‬دماغه‮ .. ‬جابله67 ‮ ‬غرزة
ف‮ ‬2‮:‬‮  ‬فين اخوكي‮ ‬الصغير
ف :1في‮ ‬المستشفي
ش :1لأ‮.. ‬ده كان في‮ ‬الجامع بيصلي
ش :2كان راكب تروماي‮ ‬نمرة واحد بيزنق في‮ ‬النسوان
ش :3تلاقيه بيجيب عيش وفول وجاي
ش :4ده في‮ ‬السجن‮ .. ‬الفران قفشه هو بيسرق رغيف عيش
ش :2آه‮ ‬يا بؤسا‮ ‬يا ولاد الكلب
ف :1 لا في‮ ‬السجن ولا في‮ ‬المستشفي‮ .. ‬ده لسه تحت الكنبة بيتفرج علي‮ ‬مجلات‮.‬
ش4 ‮:‬‮ ‬بس‮ ‬يا بت عيب ملكيش دعوة بيه
ف‮ ‬1‮ : ‬أصل أنا شوفت‮ ..‬
ش : 1شوفتي‮ ‬إيه‮ .. ‬أقعدي‮ ‬ذاكري
ف1‮ ‬ :أصل أنا قريت‮ ..‬
ش :2 قريتي‮ ‬إيه‮ .. ‬أقعدي‮ ‬ذاكري
ف‮ ‬1‮: ‬أصل أنا حسيت‮ ..‬
مج‮:‬ ‮ ‬حسيتي‮ ‬بأيه؟‮..‬
ف2‮:  ‬يا دكتور
ش :1يا حلاق
ش :2 يا جزار
ش3 ‮:‬‮ ‬أي‮ ‬واحد‮ ‬يجيب سلاحه وييجي
ف‮ ‬1‮ : ‬‮ ‬لا خلاص‮ .. ‬مش ها أحس تاني‮ ‬بلاش‮ .. ‬سيبوني
ش4 ‮: ‬خلاص‮ .. ‬كله تمام
ف2‮:‬‮  ‬دلوقتي‮ ‬بقي‮ ‬ها تعرفي‮ ‬تذاكري‮ .. ‬ذاكري
ف‮ ‬1‮ : ‬‮ ‬واشمعني‮ ‬أنا بس اللي‮ ‬أذاكر‮ .. ‬كله‮ ‬يذاكر‮ .. ‬كله‮ ‬يذاكر
ش : 1كله‮ ‬يحفظ قصيدة أمير الشعراء‮ ..‬
ش2‮:‬‮ ‬ حسام حسن‮..‬؟
ش3 ‮: ‬طيب ليه مفيش حاجة لفؤاد حداد أو فؤاد نجم
ف2‮:‬‮  ‬أو فؤاد المهندس
ش4 ‮: ‬آه‮ .. ‬ده انت شيوعي‮ ‬بقي‮ ‬
ش3 ‮: ‬لا والله
ش : 1تبقي‮ ‬من الإخوان
ش3 ‮: ‬برضو لأ
ش4 ‮: ‬يعني‮ ‬لا راية حمرا ولأ راية سودة‮ .. ‬انت زملكاوي‮ ‬ولا إيه ؟
ش3 ‮: ‬إيه
ش : 1إيه‮ ‬يا أخي‮ .. ‬إنتوا عاوزين إيه بالظبط ؟
ف‮ ‬1‮ : ‬‮ ‬عروسة‮ .. ‬عروسة بتقول بابا وماما
ش :2سيف ميكونش خشب ولا فيه لامبه
ش3 ‮: ‬كتاب بس‮ ‬يكون مكتوب بحق وحقيقي
ش : 1إنتا بتقرا لمين‮ ‬يا ابني‮ ‬؟
ش3 ‮: ‬أنا بقرا لـ‮ ..‬
ش4 ‮: ‬ليه‮.. ‬بتقرالهم ليه ؟
ف2‮: ‬‮ ‬ليه مبتقريش للأستاذ الكبير فلان الفلاني
ش4 ‮: ‬أو للكاتب علان العلاني
ش : 1أو الفذ الجهبذ فلان أبو فانلة
ش3 ‮: ‬مش عاوز أقرالهم
ش4 ‮: ‬ليه ؟
ش2‮: ‬عشان أنا حر
الراكبين:‮ ‬ حر‮ !!! .. ‬شي‮ .. ‬شي
المركوبين:‮ ‬ نمشي‮ ‬لفين بالظبط ؟
ش : 1آه صحيح‮ .. ‬نمشي‮ ‬منين
ش4 ‮: ‬ما تيجوا نمشي‮ ‬يمين
ف2‮: ‬‮ ‬لأ لأيمين زحمة وحر‮ ‬
ش4 ‮: ‬خلاص خلاص تعالوا نمشي‮ ‬يمين
الراكبين‮: ‬شي‮ ‬يمين‮ .. ‬شي‮ ‬يمين
ف‮ ‬1‮ :‬‮ ‬أي‮ .. ‬ضهري‮ ‬وجعني‮ ‬يا كفرة
ش2‮: ‬إنتوا فاكرنا حمير ولا إيه ؟
ش3 ‮: ‬لأ كفاية‮  .. ‬أقلبهم من فوق ضهرك
الراكبين:‮ ‬ إيه ده ؟
ش3 ‮: ‬دي‮ ‬ثورة
ش2‮: ‬لأ ده إنقلاب
ف‮ ‬1‮ :‬‮ ‬ثورة ولا إنقلاب‮ .. ‬المهم إنه حصل‮ ‬
ش : 1يعني‮ ‬إنتوا دلوقتي‮ ‬عاوزين إيه بالظبط ؟
ش3 ‮: ‬إحنا قررنا نمشي‮ ‬شمال
ش4 ‮: ‬هل جاءكم نبأ صاحبات الرايات الحمر‮ ‬يا سادة ؟
ش : 1ماذا حدث لهن؟
ش4 ‮: ‬لقد أحرقوا خيامهن
ف2‮:‬‮   ‬لقد أحسنوا صنعاً‮ .. ‬لا‮ ‬يوجد مكان للعاهرات بيننا
ش : 1بالطبع‮ .. ‬نحن قوما نخاف الله
ف2‮:  ‬العاهرات لا‮ ‬يمتن إلا حرقاً
ف‮ ‬1‮ :‬‮ ‬إيه‮ .. ‬بتحبي‮ ‬الموضوع‮ ‬يحصل والنور ماطفي‮ .. ‬بتتكسفي‮ .. ‬طيب ما هي‮ ‬هي‮ .. ‬آه‮ ‬يا بتاعة الدعارة‮ ‬يا صايعة
ش : 1الظاهر عليها ثورة دموية‮ .. ‬مش ده اللي‮ ‬قال عليه جان جاك روسو
ش4 ‮: ‬ولا جان بول سارتر
ش : 1ولا جان بول بلومندو بتاع بانوراما فرنسية
ش3 ‮: ‬إنتوا عاوزين إيه ؟‮.. ‬والله لأولعلكم فيها بجاز
ش : 1جاز إيه‮ ‬يا اهبل ما سرقوه
ش4 ‮: ‬مش كنا ولعنا فيه كان أحسن
ف2‮:  ‬يعني‮ ‬ها نمشي‮ ‬منين دلوقتي‮ ‬؟‮.. ‬ومين ها‮ ‬يركب مين ؟
ش3 ‮: ‬يعني‮ ‬إحنا ضعنا‮ ‬يعني‮ ‬ولا إيه ؟
ش : 1أنا شايف إن أي‮ ‬حد‮ ‬يركب أي‮ ‬حد‮ .. ‬ويمشي‮ ‬بيه في‮ ‬أي‮ ‬سكة
ش3 ‮: ‬بطلوا عبط بقي‮ .. ‬مش ها‮ ‬ينفع أفديكم تاني
ش3 ‮: ‬لو دقيتوا الوتد في‮ ‬إيديا اليمين‮ .. ‬قلبي‮ ‬ها‮ ‬يقول إني‮ ‬متبري‮ ‬منكم‮ .. ‬لو دقيتوا الوتد في‮ ‬إيديا الشمال‮ .. ‬صوابعي‮ ‬اللي‮ ‬بترتعش ها تشاور عليكم ملاعين‮ ..‬
مج‮ ‬: ‮ ‬اعمل حاجة عشان خاطرنا
ش3 ‮: ‬لو حطيتوا الشوك فوق جبيني‮ .. ‬دمي‮ ‬ها‮ ‬يروي‮ ‬الأرض ويزرع شجرة‮ .. ‬كل ثمرة فيها كرهاكوا
مج‮ ‬:‮ ‬ اعمل حاجة عشان خاطرنا
ش3 ‮: ‬أعمل حاجة إزاي‮ ‬وانا مصلوب‮ .. ‬إنتوا عاوزين إيه بالظبط ؟
ف :1‮ ‬عروسة بتقولب بابا وماما
ف2‮:  ‬نص رغيف في‮ ‬حتة لحمة
ش2 ‮: ‬سيف ميكونش خشب ولا فيه لامبه
ش : 1بنت ناعمة ولابسة فستان أزرق
ش4 ‮: ‬أي‮ ‬حاجة والسلام
ش : 1خلاص‮ .. ‬فكوه‮ .. ‬أنا لقيت الحل
مج‮ ‬: ها تعمل إيه‮ .. ‬ها تعمل إيه
ش : 1ها اتكلم واصيح واكشف كل مستور
ف :1‮ ‬أستر عليا الله‮ ‬يخليك
ف2‮:  ‬وكان ليه من الأول‮ ‬يا صايعة
ف :1‮ ‬يا ولاد الحلال‮ .. ‬في‮ ‬حلم صغير تايه‮ .. ‬اللي‮ ‬يلاقيه‮ ‬يجيبه هنا بسرعة‮ .. ‬ألا في‮ ‬ناس بتموت‮.‬
ف2‮:  ‬لأ‮ .. ‬اياكم حد‮ ‬يموت‮ .. ‬ألا الموت دلوقتي‮ ‬بقي‮ ‬بشئ وشويات‮ .. ‬ها نجيب منين ؟
ش : 1فان جوخ المسكين‮ .. ‬عاش فقير ومات فقير‮ .. ‬قطع ودنه وأداها هدية لحبيبته‮ .. ‬مكنش‮ ‬يعرف إنها هاتبيع لوحات بملايين‮ .. ‬وها تنام مع رجالة كتير أوي‮ ‬غيره‮ .. ‬بس الغريبة إنها احتفظت بودنه تحت المخدة‮ .. ‬يا تري‮ ‬احتفظت بيها ذكري‮ ‬ولا عشان تعذبه‮ .. ‬ليه سابت ودنه تحت المخدة؟
ف :1‮ ‬سامع إيه ؟
ش : 1يتحديان الصمت بالقبلات‮ .. ‬تلذعني‮ ‬بصوت من لهيب‮ ‬
ف :1‮ ‬سامع إيه ؟
ش : 1الهمس‮ .. ‬اللمس‮ .. ‬النظرات‮ .. ‬اللفتات‮ .. ‬الصمت الرهيب
ف :1‮ ‬سامع إيه ؟
ش : 1عيناك في‮ ‬عينيه‮ .. ‬في‮ ‬شفتيه‮ .. ‬في‮ ‬كفيه‮ .. ‬ويداك ضارعتان في‮ ‬لهف عليه‮ ‬
ف :1‮ ‬سامع إيه ؟
ش : 1ها اسمع إيه تاني‮ ‬؟‮ .. ‬ده أنا مت‮ ‬100 ‮ ‬مرة علشانك‮ .. ‬انما الغريب ابن الغريبة عمره إدالك حاجة‮ .. ‬تديله نفسك ليه ؟
مج‮ ‬: إرسمنا دلوقتي
ش : 1مينفعش‮ .. ‬الأقلام الجاف اتكسرت والحبر اتدلق‮ .. ‬والأقلام الرصاص اتقصفت ومفيش برايات
مج‮ ‬: ‮ ‬ارسمنا دلوقتي
ش : 1ما بقتش أعرف أميز الألوان من بعض‮ .. ‬ده حتي‮ ‬مفيش ألوان
مج‮ ‬: ‮ ‬ارسمنا بدمك
ش : 1دلوقتي‮ ‬بس بقيت استخسر دمي‮ ‬فيكم‮ .. ‬إنتوا عاوزين إيه بالظبط
ف2‮: ‬ياولاد الحلال‮ .. ‬محدش شاف نص رغيف فيه حتة لحمة ؟
ف :1‮ ‬يا ولاد الحلال‮ .. ‬محدش شاف عروسة بتقول بابا وماما ؟
ش2 ‮: ‬محدش شاف سيف ميكونش خشب ولا فيه لامبه؟
ش3 ‮: ‬محدش شاف كتاب بس‮ ‬يكون مكتوب بحق وحقيقي    
ش : 1بنت ناعمة لابسة فستان أزرق
ش4 ‮: ‬محدش شاف أي‮ ‬حاجة والسلام
ف2‮:  ‬إيه‮ .. ‬مالكم ؟
مج‮ ‬: إحنا تعبنا
ف2‮:  ‬لا شدوا حيلكم كده واصلبوا طولكم‮ .. ‬خلوا لحمكم زي‮ ‬لحم الفيل‮ .. ‬اللي‮ ‬ييجي‮ ‬يعضوا سنانه تنكسر
مج‮ ‬: إحنا تعبنا أوي
ف2‮:  ‬عاوزين تناموا‮ .. ‬أحكيلكم حدوتة‮ .. ‬كان‮ ‬ياما كان‮ .. ‬زمان‮ .. ‬في‮ ‬الحارة الطيبة‮ .. ‬أيام ما كانت طيبة‮ .. ‬كان في‮ ‬واحدة ست عندها اتناشر بنت‮ .. ‬في‮ ‬يوم قالولها‮ ‬يا ماما‮ ....‬
مج‮ ‬: عاوزين ناكل توت
ف2‮:  ‬لفت ماما في‮ ‬السوق‮ .. ‬من العتبة لباب اللوق‮ .. ‬قالولها‮ ...‬
ش : 1التوت ده‮ ‬يا اختي‮ ‬في‮ ‬جنينة عم سلامة‮ .. ‬وده قبلي‮ ‬أسيوط
ف2‮: ‬راحت ماما أسيوط‮ .. ‬في‮ ‬وابور بيقول‮ .. ‬
مج    : توت توت‮ .. ‬توت توت‮ .. ‬توت توت توت توت توت‮ .. ‬تووووووووت
ف2‮: ‬نزلت المحطة‮ .. ‬وعيالها الاتناشر في‮ ‬ديلها‮ .. ‬سألت علي‮ ‬جنينة عم سلامة‮ .. ‬ولاد الحلال دلوها‮.. ‬وصلت بوابة الجنينة ساعة العصاري‮ .. ‬وحكت لعم سلامة حكاية الاتناشر بنت اللي‮ ‬نفسهم‮ ‬ياكلوا توت‮ .. ‬لكن عم سلامة قالها‮ ...‬
ش2 ‮: ‬ماينفعش
مج‮ ‬: مينفعش ليه ؟
ف2‮:  ‬اتحايلت ماما علي‮ ‬عم سلامة‮ .. ‬لكن برضوا قالها‮ ...‬
ش2 ‮: ‬ما‮ ‬ينفعش
مج‮ ‬: ما‮ ‬ينفعش ليه ؟
ف2‮:  ‬اتحايلت ماما اكتر‮ .. ‬اتحايلت قوي‮ .. ‬اتحايلت ع الآخر
ش1‮: ‬لا‮ .. ‬احنا منرضاش بكده أبداً
ف :1‮ ‬تجوع الحرة ولا تأكل بثدييها
ف2‮:  ‬ما أنا مكنش عندي‮ ‬غيرهم
ش3 ‮: ‬إنتي‮ ‬عارفة إنتي‮ ‬بقيتي‮ ‬إيه‮ .. ‬أقدم مهنة في‮ ‬التاريخ
ش4 ‮: ‬الكلمة دي‮ ‬قالها الفيلسوف الكبير عمرو دياب‮ .. ‬وقالها لسيمون في‮ ‬فيلم آيس كريم في‮ ‬جليم
ف2‮: ‬المهم إن عم سلامة إدي‮ ‬لماما الإذن بدخول الجنينة‮ .. ‬لكن وهو بيتيمم عشان‮ ‬يصلي‮ ‬العشا نده عليها وقاللها
ش2 ‮: ‬يا ست‮ .. ‬شجرة التوت أول شجرة علي‮ ‬إيدك اليمين‮ .. ‬بس‮ ‬يا خسارة الشجرة ما طرحتش السنة دي‮ .. ‬التوت حلف ما‮ ‬ييجي‮ ‬تاني‮ .‬
مج‮ ‬: فين التوت ؟
ف2‮: ‬ما أنا وصلتكوا لحد الجنينة
مج‮ ‬: فين التوت ؟
ف2‮:  ‬الشجرة عندكوا أهه‮ .. ‬ما تسألوها‮ ‬
مج‮ ‬: فين التوت ؟
ف2‮:  ‬أبيع إيه تاني‮ ‬عشان ترتاحوا‮ ‬يا ولاد الكلب
مج‮ ‬: فين التوت ؟
ف2‮: ‬إنتوا عاوزين إيه بالظبط ؟
ش : 1عروسة بتقول بابا وماما
ش3 ‮:‬ كتاب بس‮ ‬يكون مكتوب بحق وحقيقي
ش : 1بنت ناعمة لابسة فستان ازرق
ش4 ‮: ‬أي‮ ‬حاجة والسلامة
ش2 ‮: ‬يا أغبيا افهموا‮ .. ‬جيوش سليمان وقفت زمان عشان كان فيه سليمان‮ .. ‬لكن دلوقتي‮ ‬مفيش‮ .. ‬الجيش ده مبيوقفش‮ . . ‬ها‮ ‬يسحلنا كلنا‮ .. ‬هاتدهسنا كل حوافر الخيول‮ .. ‬الخيالة اللي‮ ‬راكبين فوق الحصنة‮ .. ‬نظرهم ما بيجبناش‮ .‬
مج‮ ‬: سفينة نوح
ش2 ‮: ‬الطوفان جاي‮ ‬أسرع مننا‮ .. ‬مش ها نلحق نبنيها
مج‮ ‬: خاتم سليمان
ش2 ‮: ‬وقع منه في‮ ‬البحر ولسه الدرافيل بتدور عليه‮ .. ‬الدرافيل ولا احنا ؟
مج‮ ‬: طب عصا موسي
ش2 ‮: ‬غرقت فرعون واحد‮ .. ‬لكن العرض ليه ورثة
مج‮ ‬: يبقي‮ ‬حوت‮ ‬يونس‮ ‬
ش2 ‮: ‬ما بيبلعش‮ ‬غير الأنبيا‮ .. ‬خلاص الجيش وصل أهو‮ .. ‬قولولوا بقي‮ ‬إنتوا عاوزين ايه ؟
مج‮: ‬ولا حاجة
ش2 ‮: ‬نعم قولولوا إنتوا عاوزين ايه بالظبط ؟
ف2‮: ‬صورة‮ .. ‬عاوزين صورة‮ ‬
مج‮ ‬: صورة صورة صورة‮ ..‬كلنا كدة عاوزين صورة
ش2 ‮: ‬لأ مش ده اللي‮ ‬إنتوا كنتوا قايلينه‮ .. ‬بنت ناعمة لابسة فستان أزرق‮ .. ‬نص رغيف في‮ ‬حتة لحمة‮.. ‬كتاب بس مكتوب بحق وحقيقي‮ .. ‬عروسة بتقول بابا وماما‮ .. ‬طيب أي‮ ‬حاجة والسلام‮ .. ‬آه‮ ‬يا جبنا‮.‬
مج‮ ‬: صورة للشعب الفرحان تحت الراية المنصورة
ش3 ‮:‬ ياعم‮ .. ‬إحنا في‮ ‬الحالة دي‮ ‬عيال وبنلعب
مج‮ ‬: آه‮ ‬يلا نلعب‮ .. ‬يلا‮ ‬يلا‮ .. ‬دوري‮ ‬دوري‮ ‬دوري‮ ‬دوري‮ ... ‬فركش
ش2 ‮: ‬طيب وليه فركش ؟
مج:‮ ‬ علشان دوري
ش2 ‮: ‬بطلوا معيلة بقي‮ ‬وهاتوا الحصنة وتعالوا ورايا‮ ..‬
ش4‮:‬ أبويا ابويا‮ .. ‬أكل الحصان بتاعي‮ ‬يا ابويا‮ .. ‬سرق الحصان بتاعي‮ ‬يا أبويا‮ .. ‬أنا عاوز الحصان بتاعي‮ ‬يا أبويا
ف :1‮ ‬موتيه ليه‮ .. ‬خدتيه مني‮ ‬وسكت‮ .. ‬إانما ليه موتيه ؟
ف2‮:  ‬أصله كان خلاص خلص‮ .. ‬مبقاش له لازمة‮ .. ‬بقي‮ ‬عامل زي‮ ‬ورقة الشجر الدبلانة اللي‮ ‬لازم تقع من علي‮ ‬الغصن
ف :1ومين اللي‮ ‬عينك حاكمة علي‮ ‬الفصول‮.. ‬إيه هو الربيع بإذنك والخريف بإذنك‮.. ‬ده في‮ ‬شرع مين؟
ف2‮:  ‬في‮ ‬شرعي‮ ‬أنا‮ ‬
ف :1‮ ‬طيب كنتي‮ ‬رجعتهولي‮ ‬تاني‮ ‬بدل ما تموتيه‮ ‬
ف2‮:  ‬بقول لك كان خلاص خلص‮ .. ‬ما بقاش‮ ‬ينفعك انتي‮ ‬كمان‮ .. ‬وأنا اللي‮ ‬يدوقني‮ ‬ما‮ ‬يدوقش بعدي
ف :1‮ ‬آن الأوان أموتك‮ .. ‬بس اعرف موتيه إزاي‮ ‬؟
ش : 1في‮ ‬ناس بيقولوا إنه كان راجع من الحرب هلكان‮ .. ‬راحت حطاله السم في‮ ‬طبق الفتة‮ .. ‬أصله كان راجع جعان أوي
ش2 ‮: ‬لا ده كان راجع تعبان‮ .. ‬قام وهما مع بعض فوق السرير راحت ضرباه بالخنجر في‮ ‬ضهره‮ .. ‬مات
ش3 ‮:‬  ناس بيقولوا كان لسه راجع من الحرب تعبان‮ .. ‬وكان عاوز‮ ‬يصلي‮ ‬ركعتين شكر لربنا‮ .. ‬بس مكنش‮ ‬يعرف إنها أمرت بتغيير القبلة‮ .. ‬فصلي‮ ‬غلط‮ ... ‬فدخلت عليه هي‮ ‬وأتباعها بالقباقيب‮ .. ‬وادوله علي‮ ‬قفاه لحد ما مات
ش4 ‮: ‬هو فعلاً‮ ‬كان راجع تعبان‮ .. ‬فدخل‮ ‬ياخد حمام‮ .. ‬راحت داخله عليه وفي‮ ‬إيديها شعر صيد‮ .. ‬ربطت الطرف الأولاني‮ ‬في‮ ‬الأكره‮ .. ‬والطرف التاني‮ ‬في‮ ........ ‬وراحت شادة الباب مرة واحدة قعد بقي‮ ‬ينزف لحد ما مات
ف :1‮ ‬لازم أموتك موتة ألعن من سليمان الحلبي
ف2‮: ‬ ‮: ‬طيب‮ ‬يلا‮  .. ‬دي‮ ‬حتة تبقي‮ ‬موتة ظريفة خالص‮ ‬
ف :1‮ ‬إنتي‮ ‬إيه بالظبط‮ .. ‬ما بتحسيش
ف2‮: ‬ ‮: ‬بالعكس ده أنا أكتر واحدة بتحس‮ .. ‬لكن أنا واقعية مش زيك واكلك الحماس علي‮ ‬الفاضي‮ .. ‬وكل شوية تقوليلي‮ ‬ها اموتك‮ .. ‬هاموتك‮ .. ‬مين اللي‮ ‬ها‮ ‬يموتني‮ .. ‬إنتي‮ ‬يا‮ ‬غلبانة ولا ابنك منصور العبيط‮ .. ‬فكري‮ ‬بعقل بقي
ف :1‮ ‬بس أنا بكرهك‮ ‬
ف2‮:  ‬ليه‮ .. ‬ده أنا حتي‮ ‬بحبك
ش : 1ما دام الأمر كذلك‮ .. ‬لنحتفل سوياً‮ ‬بنخب المصالحة‮ .. ‬وسطوع فجر الدعارة
ش2 ‮: ‬لست أدعي‮ ‬الاحتفال بالسلام والمحبة‮ .. ‬بعد صراع طويل مع المخدة‮ ‬
ش3 ‮: ‬إنه‮ ‬يوم مشهود سينشكح التاريخ بعده مفلطحاً‮ ‬أذنيه‮ ‬
ش4 ‮: ‬إذن فافرنقعوا هنيئاً‮ ‬لكم‮ ‬يا أصحاب الأكلان في‮ ‬أزمنة الهرش المقدسة
ف2‮:  ‬اؤمروا لنا بالرقص والغناء
ش : 1أيوه بس دي‮ ‬مشكلة‮ .. ‬مين اللي‮ ‬ها‮ ‬يغني‮ ‬؟
ش2 ‮: ‬المشكلة مش مين اللي‮ ‬ها‮ ‬يغني‮ .. ‬المشكلة مين اللي‮ ‬ها‮ ‬يقود الأوركسترا بعد مانور الدمرداش حط المنوم لعمو عزيز في‮ ‬كاس الويسكي
ش4 ‮: ‬خلاص‮ ‬يا جماعة‮ .. ‬تقدروا تتصلوا بمطرب تاني‮ ‬عشان‮ ‬يحيي‮ ‬الحفل
ش3 ‮: ‬إنت اللي‮ ‬ها تغني‮ ‬يا منعم
ش : 1أستاذ مختار صالح الموسيقار الكبير
ش4 ‮: ‬لأ ده عم جادوليو لاعب الترومبيتة في‮ ‬فرقة حسب الله‮ .. ‬مش كده‮ ‬يا عم جادوليو
ش3 ‮: ‬خلاص‮ ‬يا ابني‮ .. ‬السمك طلع من الميه‮ .. ‬ولا عاوزه‮ ‬يموت وهو محروم من آخر أمل ليه‮ .. ‬اتفضل‮ ‬يا أستاذ‮ .. ‬أعلن عن ميلاد نجم جديد في‮ ‬شارع محمد علي‮ .. ‬إسمه عبد المنعم صبري
مج‮ ‬: علي‮ ‬بياعين العنب‮ .. ‬علي‮ ‬بياعين العنب
ف :1‮ ‬العنب عنبي‮ ..‬والتعب تعبي‮ .. ‬بس مش ذنبي‮ .. ‬سرقوا العنب
ش : 1كان في‮ ‬تكعيبة‮ .. ‬كنا لاعيبه‮ .. ‬وبقينا نهيبه‮ .. ‬وضاع العنب
ش2 ‮: ‬كنت أنا زارعه‮ .. ‬بس مين قلعه‮ .. ‬الناس اتسرعوا‮ .. ‬عفصوا العنب
ش4 ‮: ‬إحنا أهو الليلة‮ .. ‬قمر الليلة‮ .. ‬بس بلا نيلة‮ .. ‬من‮ ‬غير العنب
ف2‮:  ‬جاعت القطة‮ .. ‬ادوها حتة‮ .. ‬حطة‮ ‬يا بطة‮ .. ‬راح فين العنب
ش3 ‮: ‬ده احنا اهو بنتعب‮ .. ‬والله ما بنلعب‮ .. ‬لكن التعلب‮ .. ‬أكل العنب
ش2 ‮: ‬بس‮ ..‬إنتوا الغنا نساكوا إنتواعاوزين ايه بالظبط ؟
ف :1‮ ‬عروسة بتقول بابا وماما
ف2‮:  ‬نص رغيف فيه حتة لحمة
ش3 ‮: ‬كتاب بس‮ ‬يكون مكتوب بحق وحقيقي
ش : 1بنت ناعمة لابسة فستان أزرق
ش4 ‮: ‬أي‮ ‬حاجة والسلام
ش2 ‮: ‬سامعين هما عاوزين إيه‮ .. ‬علوا صوتكوا علشان‮ ‬يسمعوكوا‮ .. ‬قولولهم إنتوا عاوزين إيه ؟
مج    : ولا حاجة‮ ‬
ش3 ‮: ‬ياعم‮ .. ‬قولتلك إحنا في‮ ‬الحالة دي‮ .. ‬عيال وبنلعب
مج‮ ‬: ‮ ‬يلا نلعب كلنا‮ .. ‬يلا‮ ‬يلا‮ ..‬
ش : 1أولها الجني‮ ‬الجني‮.. ‬أولها الجني‮ ‬الجني‮ ‬
ش3 ‮: ‬تانيها الجني‮ ‬الجني‮ .. ‬تانيها الجني‮ ‬الجني
ش4 ‮: ‬تالتها الجني‮ ‬الجني‮ .. ‬تالتها الجني‮ ‬الجني
ش2 ‮: ‬يلا نلعب كلنا سوي‮ ‬يلا‮ .. ‬لاعبيني‮ ‬والاعبك‮ .. ‬وأكسر صوابعك‮ .. ‬صوابعك لولي‮ ‬لولي‮ .. ‬واللي‮ ‬ها‮ ‬يقف‮ ‬يبقي‮ ‬حمار‮ .. ‬الحمار أهو أهو‮ .. ‬الحمار أهو أهو
ف :1‮ ‬أنت زعلت؟
ش4 ‮: ‬لا عادي‮ .. ‬أنا متعود علي‮ ‬كده
ف :1لأ لأ‮ .. ‬ما تزعلش‮ .. ‬تيجي‮ ‬نلعب سوي‮ .. ‬تيجي‮ ‬نلعب‮  ‬عروسة وعريس
ش4 ‮: ‬ماشي‮ .. ‬بس أنا اللي‮ ‬أعمل العريس المره دي‮ .. ‬مش زي‮ ‬المرة اللي‮ ‬فاتت
ف :1‮ ‬نلعب تحت سلم بيتنا‮ ‬
ش4 ‮: ‬أو نلعب فوق سطوح بيتنا
ش2 ‮: ‬ولد‮ .. ‬ألعبوا مع بعض‮ ‬يا حبايبي
ف2‮:  ‬ومتضربوش بعض‮ .. ‬ألعبوا حبايب
ش3 ‮: ‬يا ولاد‮ .. ‬نتيجة الابتدائية ظهرت‮ .. ‬مبروك‮ ‬يا ولاد
ش2 ‮: ‬سيبكوا من الإعدادية والثانوية وحب الوردة الصفرا اللي‮ ‬مليان‮ ‬غيره ده‮ .. ‬خشوا جامعة علي‮ ‬طول‮.‬
ش4 ‮: ‬إزيك
ف :1إزيك
ش4 ‮: ‬وحشتيني
ف :1‮ ‬وإنت كمان وحشتني
ش4 ‮: ‬هو أنا‮ ‬ينفع أمسك إيدك ؟
ف :1‮ ‬لأ طبعاً
ش4 ‮: ‬ليه بس‮ .. ‬ده أنا بحبك
ف :1‮ ‬أنا عندي‮ ‬سيكشن مهم ولازم أحضره
ش4 ‮: ‬بحبك
ف :1‮ ‬الدكتور النهارده جه‮ .. ‬وأنا لازم أحضر الـ‮ ..‬
ش4 ‮: ‬بحبك
ف :1‮ ‬بجد أصل الأسئلة جت صعبة جداً‮ ‬وأنا‮ ...‬
ش4 ‮: ‬بحبك‮ ‬
ف :1‮ ‬وأنا كمان بحبك‮ .. ‬بحبك أوي
ش : 1شوف‮ ‬يا حاج‮ .. ‬أنا شايف إن بنتك مزة‮ .. ‬تاخد فيها كام ؟‮ ‬
ش2 ‮: ‬شوف‮ ‬يا حبيبي‮ ‬دي‮ ‬لحم‮ ‬غالي‮ .. ‬وأنت كلك نظر
ش : 1خد
ش2 ‮: ‬هات‮ .. ‬وبعدين إحنا في‮ ‬الأول والآخر بنشتري‮ ‬رجالة‮ ‬
ش : 1وإحنا بنشتري‮ ‬نسوان
ش3 ‮: ‬الولد ده فقد إنتماؤه إدوله تأجيل‮ .. ‬أو جندوه بسرعة
ش4 ‮: ‬أيوه بس دي‮ ‬عروستي
ش : 1تقدر تغني‮ ‬تخونوه أو تشربلك كاسين مع أحمد رمزي‮ ‬وعبد المنعم إبراهيم
ش4 ‮: ‬بقولك دي‮ ‬عروستي
ف‮:‬2‮  ‬تقدر تحضن الوسادة الخالية
ش4 ‮: ‬عروستي
ش2 ‮: ‬ولما مصرانك‮ ‬ينفجر‮ .. ‬ها تنفعك ؟
ش3 ‮: ‬حد‮ ‬يناديله عمر الحريري‮ ‬بسرعة‮ ‬
مج‮ ‬ : عروستي
ش4 ‮: ‬حد حب حاجة‮ .. ‬وحاجة منه ضاعت
مج : عروستي
ش4 ‮: ‬بنت ناعمة جداً‮ ‬ولابسة فستان أزرق
مج : عروستي
ش4 ‮: ‬حد زي‮ ‬نملة‮ .. ‬وحد زي‮ ‬فيل
مج‮ ‬ : عروستي‮ ‬
ش4 ‮: ‬حد ليه حاجة‮ .. ‬وخدها حد تاني
مج‮ ‬ : عروستي
ش4 ‮: ‬إنتوا عاوزين إيه بالظبط؟
مج : ولا حاجة
ش3 ‮: ‬يا عم قولت لك إحنا في‮ ‬الحالة دي‮ ‬عيال وبنلعب
مج : آه‮ ‬يلا‮ ‬يلا‮ .. ‬يلا نلعب سوي
ش2 ‮: ‬تك تك تك
مج : مين ع الباب
ش2 ‮: ‬أنا الوزير الكبير الكبير
مج : عاوز إيه ؟
ش2 ‮: ‬عاوز لون‮ ‬
مج : لون إيه
ش2 ‮: ‬أحمر
ف2‮: ‬ اجري‮ ‬يا دم واروي‮ ‬شقايق الصحرا الصفرا
ش3 ‮: ‬اجري‮ ‬يا قميص نوم حرير ليلة الدخلة‮ ‬
ف :1‮ ‬اجري‮ ‬يا شربات اتدلقيوم الزفة
ش : 1اجري‮ ‬يا شمس الغروب اللي‮ ‬نازله تطش في‮ ‬المية
ش2 ‮: ‬وقعت في‮ ‬إيدي‮ .. ‬أنت اللي‮ ‬مقولتش‮ .. ‬أنت اللي‮ ‬فيها‮ .. ‬يلا
ش4 ‮: ‬تك تك تك
مج‮ ‬: مين ع الباب
ش4 ‮: ‬أنا الوزير الكبير الكبير
مج : عاوز إيه ؟
ش4 ‮: ‬عاوز لون‮ ‬
مج : لون إيه
ش4 ‮: ‬أبيض
ش2 ‮: ‬اجري‮ ‬يا حمام وهج من البنية
ش : 1اجري‮ ‬يا فستان الفرح والطرحة
ش : 1اجري‮ ‬يا خدود حبيبتي‮ ‬وقلبها البنور
ف2‮:  ‬اجري‮ ‬يا قلب الفل وطهر الحليب
ش4‮: ‬بس بس‮ .. ‬أنت اللي‮ ‬فيها‮ .. ‬يلا‮ ‬يلا
ش3 ‮:‬ تك تك تك
مج‮ ‬ : اجري‮ ‬يا أسود
ش : 1اجري‮ ‬يا قلب ناس جت تاكل قلوب ناس
ف2‮:  ‬اجري‮ ‬يا توب حداد الجدة ميتقلعش لحد الموت
ش4 ‮:  ‬اجري‮ ‬يا وقت الشدة والهدة وطفح الكوت
ش2 ‮: ‬اجري‮ ‬يا طين الأرض شوف شجرك زرعته لمين
مج    : تك تك تك‮ .. ‬تك تك تك
ش4 ‮: ‬بس‮ .. ‬أنا خلاص لقيت الحل‮ .. ‬العرافة المقدسة‮ .. ‬الخلاص بين عينيكي‮ .. ‬أيتها المقدسة
ف :1‮ ‬باركيني‮ ‬يا أماه‮ .. ‬أرجوكي‮ ‬امنحيني‮ ‬البركة
ف2‮:  ‬أبارك عينيكي‮ ‬أيتها المقدسة‮ .. ‬أمنحكي‮ ‬رؤية ما لا‮ ‬يراه الأخرون‮ .. ‬مباركة أنت‮ ‬يا زرقاء
ش4 ‮: ‬ها شايفه إيه‮ .. ‬اتكلمي‮ ‬بسرعة‮ .. ‬شايفه إيه ؟
ف :1‮ ‬مش شايفه حاجة
مج : لست مباركة‮ ‬يا زرقاء
ف :1‮ ‬دخان وغيوم كتير‮ .. ‬مش باين حاجة
مج : لست مباركة‮ ‬يا زرقاء‮ ‬
ف2‮: ‬ امنحي‮ ‬أمل‮ ‬يا ابنتي‮ ‬حق البكاء بين‮ ‬يديك
ف :1‮ ‬بكي‮ .. ‬بكي‮ ‬يأمي‮ .. ‬ومنح المجد للجميع حتي‮ ‬الشيطان‮ ‬
ف2‮:  ‬اذهبي‮ ‬فأنتي‮ ‬مباركة
ش1 ‮:‬ ها شايفة إيه‮ .. ‬بصي‮ ‬كويس‮ .. ‬شايفه إيه ؟
ف :1‮ ‬فضا‮ .. ‬فضا مليان دخان
مج : لست مباركة‮ ‬يا زرقاء‮ .. ‬لست مباركة‮ ‬يا زرقاء    
ف2‮:  ‬امنحي‮ ‬كل النوارس‮ ‬يا ابنتي‮ ‬حق العودة إلي‮ ‬شاطئك المقدس
ف :1‮ ‬منحتهم الحق‮ ‬يا أمي‮ .. ‬لكنهم ماتوا بأكل سمك مسموم
ف2‮: ‬اذهبي‮ ‬فا أنتي‮ ‬مباركة
ش3‮: ‬ها شايفة إيه دلوقتي
ف :1ألوان‮ .. ‬ألوان داخلة في‮ ‬بعض وشخبطة مش باين منها حاجة
ش2 ‮: ‬بصي‮ ‬كويس‮ .. ‬بحلقي‮ ‬أوي
ف :1‮ ‬ألوان دخان شخبطة‮ .. ‬مفيش ملامح لأي‮ ‬حاجة‮ .. ‬أنتوا عاوزين إيه بالظبط ؟
مج : نريد الرؤية‮ .. ‬أمنحيها البركة‮ .. ‬لتمنحنا الرؤية
ف2‮:‬‮ ‬أنسيتم قولكم‮ .. ‬تقولوا‮ .. ‬من رحم الأم ولدنا‮ .. ‬كي‮ ‬يقتل بعضنا بعضا‮ .. ‬استأجرتم جاركم السفاح كي‮ ‬يقتل أباكم الجائر‮ .. ‬ويحكم‮ .. ‬لقد أورثتموه لحم أمكم‮ .‬
مج    : من أصبح فوقنا‮ .. ‬أمسي‮ ‬له علينا حق الانحناء‮ .. ‬يمتطينا متي‮ ‬أراد‮ .. ‬ويفعلها‮ .. ‬يفعلها كيفما شاء‮ .‬
ف2‮: ‬إذاً‮ ‬لا تنسوا وتذكروا جيداً‮ ‬أن هذا قولكم‮ .. ‬
مج‮ ‬: من أصبح فوقنا‮ .. ‬أمسي‮ ‬له علينا حق الانحناء‮ .. ‬يمتطينا متي‮ ‬أراد‮ .. ‬ويفعلها‮ .. ‬يفعلها كيفما شاء‮ .‬
ف :1‮ ‬امنحيني‮ ‬البركة‮ ‬يا أماه
ف2‮: ‬أمك ماتت
ش2 ‮: ‬يعني‮ ‬إيه ؟
ش4 ‮: ‬يعني‮ ‬إيه‮ .. ‬إتعامينا خلاص‮ .. ‬مش ها نشوف تاني‮ ‬؟
ش1‮:‬ شخبطة
ش4 ‮: ‬لخبطة
ف :1‮ ‬هيصة ومليطة
ش3‮:‬ ألوان سايحة
ف2‮:  ‬كرابيج طايحة
ش2 ‮: ‬مش باين حاجة
مج : إنتوا عاوزين إيه بالظبط
ش : 1دي‮ ‬بواقي‮ ‬من بيت متهدم
ش4 ‮: ‬منبه بيأخر ويقدم‮ ‬
ف :1تنورة في‮ ‬مولد بتلف
ش3‮:‬ غولة ع الأحلام بتف
ف2‮:  ‬دبان ع السكر بيعف
ش2 ‮: ‬مش باين حاجه‮ ‬
مج:‮ ‬ إنتوا عاوزين إيه بالظبط
ش : 1دي‮ ‬أكفان طايره
ش4 ‮: ‬شاهد قبر
ف :1‮ ‬وطاويط دايره
ش3‮:‬ غابة صبر
ف2‮: ‬وخريطه مرسومه رصاص‮ .. ‬وخريطه مرسومه بحبر
ش2 ‮: ‬مش باين حاجة
مج‮ ‬: ‮ ‬إنتوا عاوزين إيه بالظبط‮ .. ‬إنتوا عاوزين إيه بالظبط‮ .. ‬إحنا عاوزين إيه بالظبط
‮       (‬هجوم علي‮ ‬الجمهور وذوبان كامل معه‮.. ‬مع ترديد الجملة‮)‬

 

تأليف‮: ‬سامح عثمان

معلومات أضافية

  • النص المسرحي: القطة العميا
  • تأليف: ‬سامح عثمان
  • معلومات عن المؤلف:
  • منشور في جريدة مسرحنا العدد رقم : ٢٥١

تعليقاتكم

تأكد من مليء جميع الحقول المشار اليها بعلامة (*)

You are here